हरर कमेडी फिल्म ‘फिरफिरे फिरिरी’ को ट्रेलर सार्वजनिक गरिएको छ। सोमबार चलचित्र विकास बोर्डमा आयोजित कार्यक्रमकाबीच ट्रेलर सार्वजनिक गरिएको हो।
झन्डै ३ मिनेट लामो ट्रेलरले फिल्मको कथावस्तुबारे प्रकाश पार्छ। गाउँघरमै बसेर विभिन्न पेशा अंगालेका ४ युवकहरूको जीवनमा एक युवतीको आगमनपछि उत्पन्न परिस्थितिलाई हास्य शैलीमा प्रस्तुत गरिएको छ। युवतीलाई रहस्यमय पात्रको रूपमा देखाइएको छ।
नबिन भट्ट निर्देशित फिल्म ‘फिरफिरे फिरिरी’ माघ ४ गतेबाट प्रदर्शनमा आउने तयारीमा छ।
फिल्ममा सन्दीप श्रेष्ठ, भावना उप्रेती, रविना केसी, पिटर प्रिन्स, मनोजकुमार अधिकारी, शंकर सेढाई, सूर्यमान लिम्बू, पुष्प अवस्थी लगायतको अभिनय छ। फिल्मको स्क्रिप्ट निर्देशक भट्ट र सन्दीप श्रेष्ठले मिलेर लेखेका हुन्। फिल्मको निर्माता मनोजकुमार अधिकारी हुन्।
ट्रेलर रिलिज कार्यक्रममा बोल्दै निर्माता तथा कलाकार अधिकारीले फिल्म फरक कथावस्तुमा र नौलो शैलीमा निर्माण गरिएको बताए।
फिल्ममा जितु तामाङको छायांकन, केशवराज भट्टको कोरियोग्राफी, प्रशान्त शिवाकोटीको संगीत तथा अनन्त घिमिरेको सम्पादन छ।यसलाई देशभर आरआर फिल्मस्ले वितरण गर्नेछ।
